اتعلم محاسبة صح اتعلم محاسبة صح
recent

آخر الأخبار

recent
recent
جاري التحميل ...
recent

كيف تجتاز المقابلة الشخصية بنجاح interview






اهم 10 نَصائحَ لإجتياز المٌقابلات "الانترفيو" بشكل إحترافي :
لازم تكون جاهزة على الدوام ، وماينفع لما تسمع بوظيفة تمشي يادوب تحضر واحدة ، أو "تكلفتها" سريع كِدا وتقدم بيها. .
اسواء حاجة إنك تمشي للمقابله الشخصيه " الانترفيو " كِدا بس من غير تجهيز وتحضير ومن غير خٌطة واضحة للحصول على الوظيفة ، لأنو التحضير الجيد عٌنصر مٌهم جداً في سير المقابله بصورة مٌرضية ليك .
ماهى الخطوات التى تساعدك على اجتياز المقابله الشخصيه بنجاح ؟
في مجموعة من الخطوات بتخليك تجتاز المعاينة بصورة مٌناسبة ، لأنو زي ما عارفين ممكن تكون إنت شخص كويس جداً وعندك مهارات عالية جداً وعندك نقاط قوة ممتازة "potentials " لكن ما تقدر تؤدي المقابله الشخصيه بصورة مٌناسبة ويتم إستبعادك من الأول خالص ، عندنا مٌشكلة بعض الناس اللي بيعملوا مقابلات شخصيه نفسهم ما بيعرفوا يعملوا مقابلات شخصيه وبيكون الموضوع ونسة وإنطباعات شخصية لا أكثر ولا أقل ، بعض الأحيان أسأل بعض المٌدراء إنت ليه عينت فلان وماعينت فلان ، بيقول لي بفرح وثقة شديدين إرتحت ليه والله ،
أو وشه مٌريح ، طيب ياخ ماذا عن مهارته ، كفاءته، خبرته وأداءه في المقابله الشخصيه !؟ يقول لي والله ما عارف لكن نظرتي ما بتخيب.
لا_معليش والله ((نظرتك بتخيب وبيخيب معاها أمل زول جاهز ومٌستعد ومناسب ، لمجرد إنه قلبك إرتاح لغيره ، كأنه عايز يناسبك، ياخ حتي النسب عنده parameters بتختار بيها العريس والموضوع ما متروك لراحتك الشخصية )).
عٌموماً عشان ما نتكلم خارج إطار الموضوع كتير ، بإختصار النقاط التالية تٌمثل مجموعة من النصائح اللي ممكن تساعد المٌتقدمين لوظيفة جديدة :

*أولاً : تحضير سيرة ذاتية_مٌكتملة وفعالة لتقديمها اثناء المقابله الشخصيه " الانترفيو ":
زي ما قلنا في البداية إنه السيرة الذاتية حاجة مٌهمة جداً للتقديم للوظيفة وهي البند اللي بيخلق إنطباع أول جيد لك عند الشركة "out standing first impression " ، ومؤخراً أصبحت الشركات تستبعد حتي قبل المقابله الشخصيه ، معتمدة فقط على السيرة الذاتية كتقييم أولي ووسيلة لتضييق الخيارات ، عشان كدا بتلقي واحد يقول ليك أنا بقدم لكن ما بيتصلوا علي !!، لازم ما يتصلوا عليك ياخ، إذا كان إنت مٌقدم ليهم سيرة ذاتية عبارة عن ورقة وااااحدة فيها كم "شرطة " بفوق وكلها نقاط ومختوتة في كيس مٌكرفس وصورة شخصية ما فيها!!، كأنك عايز تفاجئهم بشكلك في المقابله الشخصيه يعني ، أو عايز تجي تخش المقابله الشخصيه وتقول ليهم ""تاتاااااا " أنا فٌلان .بالله الناس تتعب جداً في السيرة الذاتية "CV" وتحضرها بصورة كويسة ومٌناسبة لأنها الخطوة الأولي في النجاح بإذن الله .
يمكنك الاطلاع على التالى اهم اسئله المقابلات الشخصيه 

ثانياً:إختيار الوظيفة المٌناسبة :
في إختبار إسمه ال"Fit Test " ، ودا إختبار عن طريقو بتحدد هل إنت مٌناسب للوظيفة دي ولا لأ(بينك وبين نفسك) ، يعني بتشوف هل عندك المهارات المناسبة للقيام بالوظيفة دي ولا لأ ، بيحضرني المثل التقليدي ل "جوثام هيل " ، قال فيه ، هل يٌعقل أن تٌقدم لوظيفة سائق وأنت لا تستطيع القيادة ؟ أو وظيفة مٌنقذ في حوض سباحة وأنت لا تعرف كيف تسبح !؟ ، يعني إتأكد إنك عندك القدرة والمهارة الكاملين للقيام بهذه الوظيفة .

ثالثاً:تجميع معلومات جيدة_عن الشركة اللي إنت مقدم ليها :
قبل ما تمشي المعاينة لازم تكون معلومات كويسة جداً عن الشركة أو المؤسسة اللي إنت مٌقدم ليها ، ما بس عشان لو سألوك عن معلومة عنهم تجاوب ، كمان عشان مٌهم تعرف المؤسسة اللي إنت متوقع تشتغل فيها ، وتعرف منو هو المالك إذا كانت خاصة طبعاً ، ومنو المدير ومنو الشخص /الأشخاص اللي حيعملوا معاك المٌعاينة ، ومنو صاحب القرار وكمان حيكون كويس أو عرفت آخر شخص تم قبوله في الشركة وتسأله عن سير المٌعاينة وكدا .

رابعاً الحٌضور في الوقت المٌناسب للمٌعاينة :
لاحظ قلت الوقت المٌناسب ، يعني مواعيدك خمسة مثلاً(٥:٠٠) ، تكون أمام الشخص اللي بيدخل المعاينات الساعة ٤:٥٥ ، يعني ما ٥:٠١ .
وكمان ما تجي الساعة الساعة ٤:٣٠ وتعمل فيها جاي بدري ! دي كمان نقطة ممكن تتاخد ضدك . حتي لو خايف من موضوع المواصلات والزحمة وكدا ، تعال وأصل بدري لكن ما تدخل الشركة إلا في الوقت اللي إتفقنا عليه .

*خامسا ً#المظهر_المٌناسب :
تعال وإنت لابس كويس (قاااااااشر ) ، إختار أحسن حاجة عندك وأخد رأي الناس اللي بتثق في رأيهم في موضوع اللبس دا ، تعال لابس لَبْس رسمي (بعد من الألوان الفاقعة والألوان الملفتة للإنتباه -ركز مع الأبيض والرمادي والأزرق بدرجاته طبعاً وهكذا ) حبَّذا كمان لو قدرت إتحصلت علي بدلة ولو بالعدم (كرفِتة) ، بالنسبة للبنات ما تلبسي لَبْس (حفلات ) بَعْدِي خاااالص من ال(make up ) (المكياج) ، بالذات النوع الصاااارخ داك ، وموضوع العطر الشدييييد داك كمان بعدي منه .
يعني ألبس حٌلو وخليك أنيق 😍

*سادساً :البداية_الصحيحة :
أهم حاجة ضربة البداية ، لازم تتأكد إنك بديت المٌعاينة بصورة مٌحترفة ، يعني شنو :
1- أول ما تدخل سلم علي الشخص/الأشخاص اللي قدامك ، بتحية مٌناسبة وثابتة وواثقة وبصوت واضح ، مِثال : (السلام عليكم ورحمة الله -صباح الخير أو مساء الخير -*علي حسب التوقيت طبعاً ) مٌعظم الحاجات اللي لاقتني بتقول ليك بعد من إنك تسلم عليهم في إيديهم (من غير مٌصافحة يعني ) ، سلم وأقعد طوالي يعني ما تنتظر الإذن بالجلوس .
أوعك_تكتر_السلام ((يعيني موضوع الله يسلمك الله يبارك فيك الله يسلمك الله يبارك فيك دا مااااافي ، وموضوع كيف حالكم ، الله يسلمكم برضو ماااافي )) .تحية مٌختصرة وواضحة ومافيها كلمات كتيرة.
2-ما تبدأ تتكلم إلا لما يطلبوا منك تتكلم .
3- تواصل الأعين أو "eye contact " ، يعني ما تقعد وتنزل عيونك في الأرض (بعض المٌدراء بيتعمدوا يسكتوا في الأول عشان يشوفوك حتتصرف كيف وحتتجه ببصرك وين 😁) ، وكمان ما تعاين ليهم في عيونهم من غير ما تزيح بصرك عنهم ((ما عايزك تكسر عين الراجل 😂) ، وزع بصرك بين الأشخاص الموجودين في غرفة المٌعاينة بهدوء شديد وثقة بس من غير ما تنزل عيونك في الأرض ، أو ترفعها في السقف ، أو تعاين في يدك .
4- إنتظر أول سؤال ، أٌخد نفس عميق ، خلي السؤال ينتهي ، إنتظر ثواني وأبدأ جاوب ، السؤال بكل هدوء ، حبَّذا لو بديت كلامك بكلمة نعم - ودي بتكون مٌباشرة بعد ما يسألوك السؤال . مِثال :
لو سألك قال ليك إتكلم لينا عن نفسك مثلاً :
قول : نعم وبعد كِدا أبدأ طوالي في الكلام عن نفسك .
ونعم هنا معناها =فهمت سؤالك جيداً وسأبدأ بالحديث .

*سابعاً:كٌن_أنتَ
يعني خليك علي طبيعتك ، ما تغير طريقة كلامك ، ما تتغمص شخصية زول تاني ، ما تغير صوتك ، ما تدعي حاجات مافيك ، ماتغيري صوتك (للبنات😁) ، ما_تتكلف وماتحكي بٌطولات وهمية وقصص خيالية ، عشان الصدق مٌهم وكمان المٌدراء ديل كانو زيك وعملوا كمية من المٌعايانات ، فبالتأكيد مروا بمرحلتك دي ، يعني ماااا تسوق الجماعة .

ثامِناً:أثناء_المٌعاينة :
1- خليك قافل موبايلك ، تماماً ، ما تعملو صامت ، لا أقفلو تماماً .
2- ما تتكلم كتير ، أٌخد نفس عميق قبل ما تجاوب علي الأسئلة،ما تضحك من غير سبب ، وماتضحك كتير (ماتاخد راحتك شديد يعني ) .
3- مافهمت السؤال !؟ ماتجاوب وتندااااح وبعد تخلص تلقي نفسك جاوبت غلط ، لا ، بكل هدوء قٌول :معليش مٌمكن السؤال تاني !؟ وتأكد ما حيكون عنده مٌشكلة يعيدوا ليك .
4- ماتٌظهر أي نٌوع من الإنتماءات الحزبية أو السياسية أو حتي إنتمائك لفريق كٌرة مٌعين ((بتفرق والله 😂😂))
5- لو قال ليك قارن بين نفسك وبين مٌنافسيك (المٌقدمين معاك علي الوظيفة دي ))، #أوعك تذكٌرهم بالسوء ، بس إتكلم عن إيجابياتك ونقاط قوتك وما تضرب في غيرك 
.
* تَاسِعاً: إجابات_نموذجية:
1- ليك إتكلم عن نفسك!؟ ، أول حاجة في السؤال دا ، #أوعك تتكلم إنجليزي وإنت ضعيف فيه ، إتكلم عربي وخليك واضح (ما تتشالق)) ، وكمان ما تحكي ليهم من الإبتدائي ، في ناس تقول ليه إتكلم عن نفسك يقول ليك(( من أولي لحدي خامسة درست في مدرسة كِدا ومن سادسة لحدي ثامنة قريت في مدرسة كِدا ، وعدت سنة تامنة عشان ما جِبت النسبة الدايرها ...إلخ)) ، خليك مٌحدد وإتكلم في النقاط المٌهمة وما تحكي قصص ماراثونية !
2- ليه خليت شركتك القديمة !؟؟ خليك مٌحدد بس ما تجيب سيرتهم بسوء مهما حاول معاك ودفعك للنقطة دي ، حتي لو إضطريت تقول ليه ((ناس إشتغلت معاهم ما بذكرهم بسوء )) .
3- مٌتوقع مٌرتب كم !؟ هِنا خليك حذّر شوية ((لازم تكون عرفت مٌرتب الوظيفة دي كم عندهم - وتقول مٌرتب قريب منها )) عشان لو قلت مٌرتب عاااالي حيستبعدوك ويقولوا الزول دا طٌموحو أكبر من الوظيفة دي ، ولو قلت مٌرتب مٌتدني ممكن يستبعدوك برضو ، وممكن يقبلوك لكن حيقللوا ليك مٌرتبك وتكون ظلمت نفسك .
4- متين ممكن تنزل معانا !؟ أقرب وقت ممكن . أو لو كنت شغال قول ليه ، مٌحتاج بس أسلم شغلي القديم وأكون معاكم طوالي بإذن الله ، لو كٌنت #عاطل ، قوليه ممكن بعد المٌعاينة مباشرة 😂😂.
5- عِندكْ سؤال لينا !؟ فاجِئهم وقول ليهم : متين حأستلم الشغل .😂😂
*في مجموعة من الأجوبة النموذجية حنعرضها في بٌوست مٌنفصل بإذن الله .

عاشراً : بريد الإطمئنان الإحترافي :
النقطة العاشرة دي صراحة عرفتها مؤخراً ، من د.سامويل فير ، المٌشرف التقني لي في رسالة الدكتوراة ، قال لي وهو بينصح فيني ، وأنا داخل علي مٌعاينة مٌهمة جداً ، قال لي : بعد المٌعاينة تخلص ، أطلب من الشخص اللي حيعمل ليك المٌعاينة البريد الإلكتروني بتاعه ال"Email" ، ولما تصل البيت أول حاجة تعملها ترسل ليه رسالة وتشكرو فيها علي المٌعاينة وتقول ليه كم كلمة كِدا مٌناسبة بس من غير ما تٌكثر في الثناء عليه وما تطلب منه خاااالص رأيه في المٌعاينة ولا غيرو .((قَشرت بيها علي الزول اللي بعدو وظبطت معاي 😁))

الحادي عشر : حأترك المجال للناس تكتب النصائح لبعض في التعليقات وكٌلنا بنتعلم من بعض .
*مع أمنياتي لكم بالتوفيق والسداد.

عن الكاتب

Moahmed

التعليقات



إذا أعجبك محتوى مدونتنا نتمنى البقاء على تواصل دائم ، فقط قم بإدخال بريدك الإلكتروني للإشتراك في بريد المدونة السريع ليصلك جديد المدونة أولاً بأول ، كما يمكنك إرسال رساله بالضغط على الزر المجاور ...

إتصل بنا

جميع الحقوق محفوظة

اتعلم محاسبة صح

2016